Miðhausthátíðin er ein af mikilvægustu hátíðum Kínverja. Í samræmi við kínverska dagatalið ber mitt haust upp á 15. dag 8. mánaðar og af því dregur hátíðin nafn sitt. Í ár ber daginn upp á fimmtudaginn 19. september samkvæmt okkar tímatali. Því var trúað að þennan dag næði kringlótt form tunglsins og ljómi þess hámarki. Samkvæmt kínverskri þjóðtrú táknar fullt tungl endurfundi og því fagna Kínverjar deginum gjarnan í faðmi fjölskyldunnar. Tunglkökur eru einnig órjúfanlegur partur af hátíðahöldunum.

Tilbeiðsla tunglsins er aldagömul hefð í Kína. Finna má útsýnisskála til tunglskoðunar í flestum sögufrægum byggingum og í gegnum árþúsundin hafa orðið til ýmsir siðir og venjur sem tilheyra þessari árlegu hátíð. Allt frá Tang keisaratímanum hefur miðhausthátíðin verið ein af opinberum hátíðum í Kína. Á Song tímabilinu urðu almenn hátíðarhöld algengari og flykktist þá almenningur gjarnan í útsýnisskála til að njóta tunglsins, þeir efnameiri heimsóttu sína eigin skála. Fjölskyldur söfnuðust þá saman til kvöldverðar, jafnframt því að njóta þess að horfa á tunglið. Frá tímum Ming og Qing keisaraættanna hafa skapast ýmsar matarhefðir á þessum tímamótum, svo sem að borða rótarávöxtinn taro og tunglkökur.

Líkt og fyrr á tímum safnast kínverskar nútímafjölskyldur saman og borða kvöldverð á þessum frídegi. Gufusoðnar jarðhnetur, sneiðar af taro, hrísgrjónaseyði, fiskur og núðlur eru hefðbundir réttir við þessi tímamót. Enginn þeirra kemst þó í hálfkvisti við vinsældir tunglkökunnar. Vikum fyrir sjálfa hátíðina má sjá tunglkökur til sölu í öllum helstu verslunum, hótelum og kaffihúsum enda eftirsótt gjöf til vina og ættingja. Fyrirtæki nota gjarnan tækifærið til að senda tunglkökur til viðskiptavina sem þakklætisvott.